आगलागी हुँदा झापामा एकै परिवारका चारजनाको मृत्यु
झापा : झापामा आगलागी हुँदा एकै परिवारका चारजनाको मृत्यु भएको छ । झापाको शिवसतासी नगरपालिका ७ लाल्झोडामा आगोले जलेर एकै परिवारका चार सदस्यको मृत्यु भएको हो । घरमा अचानक लागेको आगोले जलेर उनीहरूको मृत्यु भएको हो ।
आइतबार राति ९ बजेको समयमा आगलागी भएको थियो । आगो नियन्त्रणमा आउन नसकेपछि चारै जनको मृत्यु भएको हो । स्थानीय भानु माध्यमिक विद्यालयबाट २० मिटर नजिक रहेको खनाल परिवारकको घरमा सम्पूर्ण सदस्यको सुतिरहेको अवस्थामा आगलागी भएको इलाका प्रहरी कार्यालय झिल्झिलेले जानकारी दिएको छ ।
मृत्यु हुनेमा ३६ वर्षीय लक्ष्मण खनाल, ३० वर्षीया राधिका खनाल, ४ वर्षीया सुप्रिया खनाल र तीन महिनाका नाबालक टीकाराम खनाल रहेका छन् । आगलागी जाडोमा बालेको आगोका कारण हुनसक्ने अनुमान लगाएपनि के कारणले भएको हो भन्ने खुल्न सकेको छैन । प्रहरीले घटनाको अनुसन्धान भइरहेको जानकारी दिएको छ।
