हजारौं जनसुदायबीच खुर्शिदको शवलाई भुटाहामा अन्तिम संस्कार
प्रदेश एक स्थित सुनसरीको रामनगर भुटाहामा भारतीय हतियारधारी समुहबाट मारिएका खुर्शिद आलम अन्सारीको शवलाई शनिवार अन्तिम संस्कार गरिएको छ ।
सरकारले मृतक अन्सारीलाई शहिद घोषणा गर्दै उनका परिवारलाई रु. १० लाख क्षतिपुर्ती समेत दिने निर्णय समेत गरेको छ । शनिवार हजारौं जनसमुदायबीच उनको मुस्लिम परम्परा अनुसार अन्तिम संस्कार गरिएको हो । सरकारले खुर्शिदलाई शहिद समेत घोषणा गरेकोले उनको अन्तिम संस्कारका बेला नेपाली सेना र नेपाल प्रहरीले सलामी समेत दिएको छ ।
हरिनगर गाँउपालिका अन्तरगत पर्ने रामनगर भुटाहाका अन्सरीको बिहिबार भुटाहा बजारमा उनले संचालन गर्ने बिद्यालय अगाडी नै बिच रोडमा गोली हानी हत्या गरिएको थियो । ४ जनाको समुहमा भारतीय नम्बर प्लेटको मोटरसाइकल लिएर आएका ४ जना हत्यारधारीहरुको एक समुहले गोली हानी उनको हत्या गरेर फेरि भारत तर्फ भागेका थिए ।
तिन गोली लागेका खुर्शिदको घटना स्थलमै मृत्यु भएको थियो । तर उनका परिवार आफन्त तथा स्थानियले उनको हत्या छानविन, क्षतिपुर्ती र शहिद घोषणा हुनुपर्ने भन्दै उनको शव उठ्न दिइएको थिएन । तर काठमाण्डौ स्थित गृह मन्त्रालय र सुनसरी स्थित शुक्रवार दिनभरी चलेको वार्तापछि साँझ सहमती भएको थियो ।
सहमती भएपछि शवलाई पोष्टमार्टमका लागि शुक्रवार साँझ नै धरान स्थित बिपि कोइराला स्वास्थ्य विज्ञान प्रतिष्ठान पठाइएको थियो । पोष्टमार्टमपछि खुर्शिदको शवलाई शनिवार बिहान भुटाहा स्थित अन्तिम संस्कार गरिएको हो ।
केहि मिडिया खुर्शिदको आपराधाधिक गतिबिधिमा संगलग्नता र भारतीय आंतकवादी संगठनका फरार अभियुक्तहरुलाई नेपाली नागरिक्ता र पार्सपोर्ट बनाएर उनीहरुलाई नेपालबाट भगाइएको आरोप समेत रहेको समाचार प्रकाशमा आएको थियो । तर सरकारले उनलाई शहिद नै घोषणा गरिसकेपछि ति समाचारहरु अफुवाह मात्र रहेको पुष्टि भएको हनिगर गाँउपालिकाका अध्यक्ष गफार अन्सारीले बताए ।
