ओली र मोदीले संयूक्त रुपमा गरे नेपाल-भारत मैत्री धर्मशालाको उद्घाटन (फोटोफिचर)
काठमाडौँ : गौशलाको तिलगँङ्गा स्थित भारत सरकारद्धारा निर्मित नेपाल-भारत मैत्री पशुपतिनाथ धर्मशालाको प्रधानमन्त्री केपी ओली र भारतीय प्रधानमन्त्री नरेन्द्र मोदीले संयुक्तरुपमा उद्घाटन गरेका छन् ।
एक विशेष समारोहबीच ओली र मोदीले संयुक्तरूपमा उद्घाटन गरेका हुन् । समारोहमा नेपालका प्रायः सबै मन्त्रीहरु, प्रमुख नेताहरू, सुरक्षाप्रमुखहरु लगायतहरुको उपस्थिति रहेको छ ।
भारतीय प्रधानमन्त्री मोदीले सन् २०१४ जुलाईमा पहिलो पटक नेपाल भ्रमणमा आएका बेला उक्त धर्मशाला निर्माणको घोषणा गरेका थिए।
शुक्रबार प्रधानमन्त्री ओली र मोदी दुई पक्षीय वार्ता गरेपछि धर्मशाला उद्घाटनका लागि पशुपतिनाथ पुग्ने भएका हुन्।
भारतले २२ करोड भन्दा बढी भारतीय रुपैयाँ लगानी गरेर निर्माण गरेको उक्त धर्मशालामा तीन सय ९७ जनालाई बसाल्न सक्ने ८८ वटा कोठाहरु निर्माण गरिएको छ।
करिब पाँच रोपनी जग्गामा निर्माण गरिएको उक्त धर्मशाला निर्माण कार्य नाकाबन्दीका बेला रोकिएको थियो। तर भारतीय प्रधानमन्त्री मोदी आफ्नो तेस्रो भ्रमणमा नेपाल आएपछि उक्त धर्मशाला निर्माण कार्यले तिव्रता पाएको थियो ।
