वायुसेवाको दोस्रो वाइडबडी विमान ‘मकालु’ आइपुग्यो काठमाडौं
काठमाडौं, १० साउन : नेपाल वायु सेवा निगम (एनएसी) ले दोस्रो वाइडबडी विमान भित्र्याएको छ । ए ३०३-२०० सिरिजको विमान बिहीबार बिहान त्रिभुवन अन्तर्राष्ट्रिय विमानमा अवतरण भएको हो ।
मकालु नाम दिइएको विमानको कल साइन ९ एनएलजेट राखिएको छ । नयाँ विमानलाई विमानस्थलमा मन्त्रालय र निगमका अधिकारीहरुले स्वागत गरेका थिए ।
यसअघि गत असार २४ गते निगमले पहिलो वाइडबडी विमान भित्र्याएको थियो । निगमले युरोपेली कम्पनी एयरबसले उत्पादन गरेको जहाज अमेरिकाको एएआर कम्पनीसँग किनेको हो ।
विमानको लागत २ सय ९ दशमलव ६ मिलियन अमेरिकन डलर अर्थात २१ अर्ब ९० करोड रूपैयाँ छ । निगमका अनुसार दुवै वाइड बढी विमानको सिट क्षमता समान छ ।
कूल २७४ सिट क्षमताको वाइड बडी विमानको १८ वटा सांग्रिला ‘विजनेस क्लास’ र २५६ सिट साधारण क्लासका छन् ।
