अवरुद्ध बुटवल-पाल्पा सडक एकतर्फी खुल्यो
बुटवल, ९ साउन : पहिराले अवरुद्ध सिद्धार्थ राजमार्गअन्तर्गत बुटवल–पाल्पा सडक खण्ड एकतर्फी सञ्चालनमा आएको छ । पाल्पाको तिनाउ गाउँपालिका-३, हेडबक्सनजिकै पहिरो खसेपछि राति ११ बजेदेखि सडक अवरुद्ध भएकोमा डोजरले पहिरो पन्छाएपछि बिहान साढे ६ बजेदेखि एकतर्फी सुचारु भएको पश्चिम क्षेत्रीय ट्राफिक प्रहरी कार्यालय, बुटवलले जनाएको छ ।
रातभर रोकिएका सवारी साधनहरु अहिले गन्तव्यतर्फ अघि बढेका छन् । पूरै पहिरो पन्छाएर सडक दुईतर्फी रुपमै सञ्चालनमा ल्याउन भने समय लाग्ने प्रहरीले जनाएको छ । माथिल्लो सिद्धबाबा मन्दिरनजिकै हेडबक्स भन्ने स्थानमा पटक–पटक पहिरो खस्दा सडक अवरुद्ध हुँदै आएको छ ।
