नारायणी नदीको प्रदूषण रोक्न सरोकारवालाको माग
काठमाडौँ : मुलुककै धार्मिक तथा पर्यटकीय महत्वको नारायणी नदीमा बढ्दै गएको प्रदूषण रोक्न सरोकारवालाले सम्बन्धित निकायसँग माग गरेका छन् ।
नदी किनारमा स्थापित उद्योगबाट उत्सर्जन भएका प्रदूषित वस्तु एवं हानिकारक रसायनिक पदार्थ प्रशोधन नगरी नारायणी नदीमा विसर्जन गर्ने गरेकाले प्रदूषण बढेको सरोकारवालाहरूको आरोप छ । पूर्वी नवलपरासीको गैँडाकोट नगरपालिकास्थित गोर्खा ब्रुअरी कम्पनी प्रालिले नारायणी नदीलाई बढी प्रदूषित तुल्याएको ज्ञापनपत्रको प्रतिलिपिसहित रासस कार्यालय पुगेका सञ्चारकर्मी प्रकाश रायमाझीले बताए ।
कम्पनीले वातावरणीय प्रभाव मूल्यांकन अनुसारको प्रदूषण नियन्त्रणको मापदण्ड पूरा नगरेको बताउँदै उनले नदी प्रदूषण हुँदै गएकाले मानव स्वास्थ्यमा असर परेको र नदीका जलचर प्राणीसमेत लोप हुने अवस्थामा पुगेको जानकारी दिए ।अनुगमन गरी प्रदूषण गर्ने उद्योगलाई कारवाही गर्न माग गर्दै स्थानीयवासीले प्रधानमन्त्री तथा मन्त्रिपरिषद्को कार्यालय, उद्योग, वाणिज्य तथा आपूर्ति मन्त्रालय र अख्तियार दुरुपयोग अनुसन्धान आयोगमा ज्ञापनपत्र बुझाएको गैँडाकोट नगरपालिका–७ का मोहन बहादुर थापाले बताए ।
गोर्खा ब्रुअरी कम्पनीले भने सरकारले तोकेको वातावरणीय प्रभाव मूल्याङ्कनका मापदण्ड पूरा गरेर नै उद्योग सञ्चालन गरेको दाबी गरेको छ । कम्पनीका निर्देशक प्रविण अधिकारीले उद्योगबाट निस्कने फोहर प्रशोधन गरेरमात्र नदीमा विसर्जन गर्ने गरिएकोे छ भने । कम्पनीले उद्योगबाट निस्कने प्रदूषित पानी उपचारका लागि रु आठ करोडको लगानीमा छुट्टै प्रशोधन प्लान्ट स्थापना गरेको उनले जानकारी दिए । उक्त कम्पनीमा हाल ४०० भन्दा बढी कामदार कार्यरत छन् ।
वातावरण विभागले केही महिनाअघिमात्र त्यस क्षेत्रका उद्योगले प्रदूषण गरे/नगरेको सम्बन्धमा स्थलगत अनुगमन गरेको जनाएको छ । स्थलगत अनुगमनका बेला सो कम्पनीले उद्योगको फोहर प्रशोधन गरेर नदीमा विसर्जन गरेको आफूहरुले पाएको विभागका महानिर्देशक दुर्गाप्रसाद दवाडीले जानकारी दिए ।
