ऐन,कानून बनाएर आवासविहीनको व्यवस्थापन गरिने : मन्त्री राइन
काठमाडौँ : शहरी विकासमन्त्री मोहम्मद इस्तियाक राइनले आवास ऐन बनाएर आवासविहीनहरुको व्यवस्थापन गरिने बताएका छन् । सोमबार सम्बोधन गर्दै उनले कम्पनीको नियमावली, कर्मचारी व्यवस्थापन लगायतका समस्या समाधानका लागि पहल गर्ने प्रतिबद्धता पनि जनाए । मन्त्रालयका सचिव दीपेन्द्रनाथ शर्माले संविधानमा आवासको हक सुरक्षित गरिएकाले कम्पनीले दलितलगायत विपन्न वर्गको आवासका लागि काम गर्ने दायित्व निर्वाह गर्नुपर्ने बताए ।
कम्पनीलाई संघ वा प्रदेश कुन तहअन्तर्गत राख्ने भन्ने विषयमा मन्त्रालयले गृहकार्य गर्ने वचन उनले दिए । कार्यक्रममा सांसद दिलकुमारी, कम्पनी सञ्चालक समितिका अध्यक्ष मोहन चौधरी, सञ्चालक समिति सदस्य मीरा ज्ञवाली, महाप्रबन्धक दूतबहादुर गुरुङलगायतले कम्पनीमा कर्मचारी व्यवस्थापन हुन नसक्दा काममा प्रभाव परेकाले समस्या समाधानका लागि मन्त्री राई समक्ष अनुरोध गरेका छन् । कम्पनीको २० वर्षे कार्ययोजना तयार भए पनि जनशक्ति व्यवस्थापन हुन नसक्दा कार्यान्वयन गर्न नसकिएकाले छिटो समस्या समाधान गरिदिन उनीहरुले आग्रह गरेका थिए ।
विसं २०३० मा पुनर्वास कम्पनीका नाममा खुलेको यो संस्थाको नाम ग्रामीण आवास कम्पनी हुँदै हाल राष्ट्रिय आवास कम्पनी राखिएको छ । कम्पनीको आफ्नै भवन नहुँदा केन्द्रीय कार्यालयका लागि भौँतारिनु परेकाले स्थायी भवनको व्यवस्था गरिदिन पनि माग गरिएको थियो । सो अवसरमा सफलतापूर्वक विश्वको सर्वोच्च शिखर सगरमाथा आरोहण गरेको कम्पनीका कर्मचारी सुशील शेर्मालाई सम्मान गरिएको थियो ।
