प्रदुषित गाडीहरु मन्त्री वा प्रधानमन्त्री जोसुकैको भएपनि छोड्दिन : मन्त्री बस्नेत
काठमाडौं, २१ जेठ : वन तथा वातावरणमन्त्री शक्तिबहादुर बस्नेतले प्रदुषित गाडीहरुलाई हटाएरै छोड्ने उद्धघोष गरेका छन् । मन्त्री बस्नेतले भोलिबाट ‘नेपाल स्वच्छ वातावरण महाअभियान’ सञ्चालन गर्ने बताएका छन् । उनले विश्व वातावरण दिवसको अवसर पारेर भोलि उक्त महाअभियानको उद्धघाट्न प्रधानमन्त्री केपी शर्मा ओलीले गर्ने समेत जानकारी दिए ।
सोमबार रिपोर्टर्स क्लबले आयोजना गरेको साक्षात्कारमा बोल्दै उनले भने,‘भोलिबाटै स्वच्छ वातावरण महाअभियान सुरु हुन्छ, हामी कार्यान्वयन गरेरै छाड्छौं, प्रदुषित गाडीहरु मन्त्रीहरु वा प्रधानमन्त्री जोसुकैको भएपनि छोड्दिन ।’ उनले धुलो र धुवाँबाट प्रताडित जनतालाई मुक्ती दिलाउनको लागि आफूहरुले फोहोर व्यवस्थापन र सरसफाई, प्रदुषण नियन्त्रण, हरियाली प्रर्वद्धन र स्वच्छ वातावरण बनाउन उक्त महाअभियान सञ्चालन गर्न लागेको जनाए ।
मन्त्री बस्नेतले वन क्षेत्रबाट आगामी एक वर्षभित्र एक लाखलाई रोजगारी सिर्जना गर्ने दाबी समेत गरेका छन् । उनले भने,‘हामीले सक्ने कुरा गरेका छौं, क्यालकुलेशन गरेर नै मैले त्यो कुरा बोलेको हुँ, म अहिले बजेट कार्यान्वयनको कार्ययोजना बनाउन व्यस्त छु।’
मन्त्री बस्नेतले यो कार्यक्रमले जनताको जीवीकोपार्जनमा सुधार, राष्ट्रिय अर्थतन्त्रमा सुधार र रोजगारीको अवस्था समेत सिर्जना हुने बताए । उनले भने,‘वन क्षेत्रलाई बहु–उपयोगी क्षेत्रको रुपमा विकास गर्छु, अब काठ आयात गर्ने परम्पराको अन्त्य गर्छु, वन पैदावर वस्तुहरु निर्यात गर्नेगरि अघि बढेको छु।’
मुलुकमा व्यवस्था, अवस्था र परिस्थिति परिवर्तन भएपनि मान्छेको मनस्थिति अहिलेसम्म परिवर्तन नभएको बताउँदै उनले भने,‘अब यो परिवर्तित अवस्थामा राजनीतिक दलहरु र सिँगो मुलुकका अंगहरु पनि परिवर्तन हुन जरुरी छ, मुलुक अब नयाँ युगमा प्रवेश गरेको छ, नेपाललाई समृद्ध बनाउने र सम्पूर्ण नेपालीहरुलाई सुखी बनाउने उद्देश्य पूरा गर्न सबै मिलेर अघि बढ्नुपर्छ, सरकार त्यो दिशामा लागिपरिरहेको छ।’
मुलुकलाई समृद्ध बनाउने अभियानमा सरकार जुटेको बताउँदै उनले भने,‘हामीसँग साधन तथा स्रोतहरु सिमित छन्, यसलाई अधिकतम् प्रयोग र कुशलताका साथ उपयोग गर्नुपर्ने चूनौति छ, त्यस्तै यो सरकार दिगो सरकार भएकोले जनताका धेरै ठूला–ठूला अपेक्षाहरु छन्, यो पनि आँफैमा एउटा चूनौति हो, सबैको सकारात्मक प्रेरणाले नै समृद्धि हाँसिल हुने हो।’
फरक प्रसँगमा मन्त्री बस्नेतले सरकारले पपुलिष्ट बजेट नल्याएको स्पष्ट पारे । उनले थपे,‘यो सरकार विगतकोजस्तो ६ देखि ८ महिनामात्रैको लागि होईन, सरकारसँग बहुमत छ, हामीले पपुलिष्ट कुरा गरेका छैनौं, तर यो बजेटले नयाँ दिशा समातेको छ, समृद्धिको आधार वर्षको रुपमा बजेट आएको छ।’
विकासको लागि आफ्नो मन्त्रालय बाधक नबन्ने उनको भनाई छ । उनले भने,‘हामी विकासको बाधक बन्दैनौं, तर वातावरणमैत्री विकास हुनुपर्छ, यसको लागि विभिन्न मन्त्रालयहरुसँग छलफल गरिरहेका छौं।’ समृद्ध नेपाल र सुखी नेपाली सरकारको राष्ट्रिय संकल्प भएकोले यो उद्देश्य पूरा गर्न आफूहरु पूर्ण प्रतिबद्ध रहेको उनले विश्वास दिलाए ।
