दुई प्रतिशत बालबालिका विद्यालयको पहुँचभन्दा बाहिर
नवलपरासी: नवलपरासी जिल्लामा हाल करीब दुई प्रतिशत बालबालिका विद्यालयको पहुँचभन्दा बाहिर रहेको तथ्यांक रहेको छ । शिक्षा विकास तथा समन्वय इकाई (शिक्षा कार्यालयको परिवर्तन भएको नाम) नवलपरासीका अनुसार सो तथ्यांक रहेको कार्यालयले जनाएको छ । पाठ्यपुस्तक, शैक्षिक सामग्री, पोशाक लगायतका आवश्यक सामग्रीको आभावले कुनै पनि बालबालिका विद्यालयको पहुँचभन्दा बाहिर नहुने गरी यस वर्ष कार्य अघि बढाइएको जिल्ला शिक्षा अधिकारी खड्कबहादुर कमालले जानकारी दिए ।
आधारभूत तहसम्म सामुदायिक विद्यालयका विद्यार्थीलाई सरकारले निःशुल्क पाठ्यपुस्तक उपलब्ध गराउने गरेको र उक्त रकम स्थानीय तहबाट निकासासमेत भइसकेकाले समयमै विद्यालयले पुस्तक उपलब्ध गराउनुपर्नेछ । पश्चिम नवलपरासी र पूर्वी नवलपरासी गरी दुवै जिल्लामा यस वर्षको विद्यार्थी भर्ना अभियान जारी छ । यस शैक्षिक सत्रबाट जनप्रतिनिधिले कुनै पनि बालबालिका शैक्षिक सामग्रीको अभावमा विद्यालयको पहुँचभन्दा बाहिर नहुने दाबी गरेका छन् । ‘हामी सबैको इच्छा, अनिवार्य निःशुल्क आधारभूत शिक्षा’ भन्ने नाराका साथ शिक्षा विकास तथा समन्वय इकाईले जिल्लाभरि विद्यार्थी भर्ना अभियान सञ्चालन गरिसकेका छन् ।
रामग्राम नगरपालिकाका प्रमुख नरेन्द्रकुमार गुप्ताले विद्यार्थी भर्ना अभियान सञ्चालनसँगै भर्ना भएका विद्यार्थीको निरन्तर कक्षा सञ्चालन गरी भर्ना अभियानलाई समेत निरन्तरता दिनुपर्नेमा जोड दिए । बर्दघाट नगरपालिकाका प्रमुख धिरज शर्मा बस्यालले स्थानीय तहमा खटेका शिक्षा शाखाका कर्मचारी स्थानीय तहमा पूर्ण समय दिन नसकेको भन्दै शिक्षा समन्वय इकाईले समय बन्दोबस्त गराउनुपर्नेमा जोड दिए । भर्ना कार्यक्रमलाई प्रभावकारी बनाउन वैशाख १४ गतेसम्म भित्र भर्ना हुने विद्यार्थीलाई मुस्कान सहितको फूल अबिर तथा स्थानीय संस्कृतअनुसार स्वागत गर्ने, वैशाख १५ गतेदेखि भर्ना नभएका विद्यार्थीलाई सम्पूर्ण सरोकारवालाको सहभागितामा घरदैलो भ्रमण गरी अभिभावकलाई शिक्षाको महत्वसम्बन्धी परामर्श गर्ने योजना छ ।
स्थानीय तहले कुनै पनि उमेर समूहका बालबालिका विद्यालयबाहिर नरहने प्रतिबद्धता व्यक्त गर्ने, भर्ना भएका विद्यार्थीलाई टिकाइराख्न र गुणात्मक शिक्षा व्यवस्थापनका लागि निरन्तर प्रभावकारी क्रियाकलाप सञ्चालन गर्नुपर्ने लगायतका कार्यक्रम जारी छ ।
