जनकपुर-ढल्केबर सडकखण्डमा एक पुरुषको शव फेला
धनुषा : जनकपुर–ढल्केबर सडकखण्डमा बिहिबार बिहान एक पुरुषको शव फेला परेको छ । उक्त शवको प्रकृति हेर्दा कुनै सवारी साधनले ठक्कर दिएर मृत्यु भएको र सवारी फरार भएको हुनसक्ने धनुषा प्रहरीको अनुमान छ ।
जिल्ला प्रहरी कार्यालय धनुषाका अनुसार फेला परेको शव जनकपुर उपमहानगरपालिका– ९ बस्ने ४८ वर्षीय रेवतीरमणलाल कर्णको रहेको छ ।
बिहान ५:३० बजे सडकमा कर्णको शव देखेपछि स्थानीयवासीले प्रहरीलाई खबर गरेका थिए । मृतकको गालामा सामान्य चोट बाहेक कतै कुनै घाउचोट छैन ।
शवलाई परीक्षणका लागि जनकपुर अञ्चल अस्पतालमा राखिएको र घटनाको विषयमा थप अनुसन्धान भइरहेको जिल्ला प्रहरी कार्यालय धनुषाले जनाएको छ ।
