२ नेपाली सैनिक गैंडाको खाग सहित पक्राउ
काठमाडौं : शनिबार केन्द्रीय अनुसन्धान व्यूरो (सीआईबी) को टोलीले गैंडाको खागसहित नेपाली सेनाका दुई जनासहित ३ जनालाई पक्राउ गरेको छ । उनीहरुलाई काठमाडौंको लैनचौरमा गैंडाको दुई थान खाग लिएर हिँडिरहेको अवस्थामा पक्राउ गरीएको हो ।
पक्रउ पर्नेहरुमा नेपाली सेनामा कार्यरत गोरखा सिरानचोक गाउँपालिका २ का ३३ वर्षीय हरिबहादुर ढकाल र उदयपुर त्रियुगा नगरपालिका ९ का २६ वर्षीय कृष्णबहादुर मगरलाई रहेका छन् । उनीहरुसँगै प्रहरीले गोरखा सिरानचोक २ का ३८ वर्षीय डिलबहादुर ढकाललाई पनि पक्राउ गरेको छ ।
हरिबहादुर र कृष्णबहादुरले नेपाली सेनाको परिचयपत्र देखाएपछि उनीहरुलाई कारबाहीका लागि जंगी अड्डामा पठाएको सीआईबीका प्रवक्ता एसपी जीवन श्रेष्ठले जानकारी दिए । प्रहरीले डिलबहादुरलाई भने कारबाहीका लागि आइतबार जिल्ला वन कार्यालयमा बुझाएको छ । उनीहरुबाट बरामद खाग एटा ११८० ग्राम छ भने अर्को ६४० ग्रामको रहेको छ ।
