मन्त्रिपरिषद बैठक स्थगित, बुधबार ९ बजे बस्ने
काठमाडौं : मंगलबार नै बस्ने भनिएको मन्त्रिपरिषद बैठक स्थगित भएको छ । नेपाली काँग्रेसको कार्यसमिति बैठकबाट म्याण्डेट लिएर मात्र प्रदेश प्रमुख र राजधानी तोक्ने उद्देश्यका साथ बैठक स्थगित भएको बताइएको छ ।
यसअघि प्रदेश प्रमुख र प्रदेशको अस्थायी मुकाम तोक्ने गरी मंगलबार बस्ने भनिएको थियो । मन्त्रिपरिषद बैठक अब बुधबार बिहान बस्ने प्रधानमन्त्रीका प्रेस संयोजक गोविन्द परियारले जानकारी दिए ।
प्रधानमन्त्री शेरबहादुर देउवाले मंगलबार दिउँसो साढे ४ बजे बोलाएको बैठक बुधबार विहान बिहान ९ बजेसम्मका लागि स्थगित गरेका गरेका हुन् ।
प्रधानमन्त्री देउवाले प्रदेश प्रमुख र अस्थायी मुकाम तोक्नुअघि नेकपा एमाले, नेकपा माओवादी केन्द्र लगायतका दल र आफ्नै पार्टीभित्र छलफल गर्ने तयारी गरेका छन् । प्रदेश प्रमुखको नियुक्ति नहुँदा प्रदेश सांसदहरुले सपथ पनि लिन पाएका छैनन् ।
