झन बाक्लियो दिल्लीमा हुस्स : रेलवे र हवाईसेवा अवरुद्ध
भारतको राजधानी नयाँ दिल्लीमा बाक्लो हुस्सुका कारण सोमबार त्यहाँको र रेलवे हवाईसेवा समेत अवरुद्ध भएको छ । नयाँ दिल्ली त्यस वरपरका स्थानमा आइतबार बिहानैदेखि लागेको बाक्लो हुस्सुको मात्रा नघटेको र झन बढ्दै गएपछि विमान र रेलसेवा अवरुद्ध हुन पुगेको अधिकारीहरुलाई उदृत गर्दै भारतीय संचारमाध्यहरुले जनाएका छन् । गत हप्तादेखि नै नयाँ दिल्लीमा हुस्सु लागेको थियो । हुस्सुको मात्रा आइतबार बिहानदेखि झन बढेको समाचारहरुमा जनाइएको छ । नयाँ दिल्लीको इन्दिरा गान्धी अन्तर्रा्ष्ट्रिय विमानस्थलमा सोमबार बिहान भर्नुपर्ने १२ वटा उडान अवरुद्ध भएका छन् । इन्दिरा गान्धी विमानस्थलमा अवतरण हुनुपर्ने र र उड्नुपर्ने विमानहरु उड्न नसकेको बताइएको छ ।
सोमबार बिहान उक्त विमानस्थलकमा पाँच वटा आन्तरिक र सात वटा अन्तर्रा्ष्ट्रिय उडानहरु अवरुद्ध भएको भारतीय अधिकारीहरुले जानकारी दिएका छन् । बाक्लो हुस्सुको कारण रेलसेवा पनि अवरुद्ध भएको छ । बाटो नदेखिनेगरी लागेको हुस्सुले गर्दा नयाँ दिल्लीको रेलसेवा पनि अवरुद्ध भएको छ । नयाँ दिल्ली रेलवे स्टेसन र पुरानो दिल्ली रेलवे स्टेसनका करिब ९० वटा रेलसेवा सोमबार बिहानमा मात्र अवरुद्ध भएको बताइएको छ । भारतको राजधानी नयाँ दिल्लीभरका करिब ५६ वटा रेल सेवालाई ढिला गरिएको, २० वटाको समय परिवर्तन गरिएको र १५ वटा रेलसेवा रद्द नै गरिएको उत्तरी रेलसेवाका अधिकारीले जनाएका छन् ।
दिल्लीका कैयौँ स्थानमा वायु प्रदुषणको मात्रा बढ्दै गएको अधिकारीहरुले जनाएका छन् । यहाँको तापक्रम र हुस्सुको मात्रा दुवै घट्ने मौसम विज्ञान विभागले जनाएको छ । उत्तरी भारतमा जाडो याममा, डिसेम्बर र जनवरीमा हुस्सु लाग्ने क्रम निरन्तरजस्तो हुदै आएको छ । पछिल्ला वर्षहरुमा यहाँ बढ्दो प्रदुषणका कारण हुस्सु लाग्ने गरेको बताइन्छ । यस्तो समयमा सडक दुर्घटनाको सम्भावना हुने भएकोले रेलवेसेवा लगायतका सवारी सञ्चालन जोखिमपूर्ण हुने पनि बताइएको छ । एजेन्सीहरुको सहयोगमा
