IPL : लिग चरणका सबै खेलमा विराटनगरको जित
काठमाडौं : एभरेष्ट प्रिमियर लिग (इपीएल) मा सोमबार काठमाडौं किंग्स एलेवेनलाई ८ रनले पराजित गर्दै विराटनगर वारियर्सले लिग चरणका सबै खेलमा जित हात पारेको छ । योसँगै विराटनगर क्वालिफायरमा प्रवेश गरेको छ। विराटनगरले अब फाइनल प्रवेशका लागि लिग चरणमा दोस्रो हुने टोलीसँग खेल्नेछ ।
यसअघि खेलेका ४ खेलमा अपराजित विराटनगरले अन्तिम खेलमा सोमबार काठमाडौंलाई पराजित गर्दै १० अंकका साथ शीर्ष स्थानमा रहँदै लिग चरण टुंग्याएको हो । विराटनगरले दिएको १४८ रनको लक्ष्य पछ्याएको काठमाडौंले निर्धारित २० ओभरमा ९ विकेट गुमाएर १ सय ३९ रनमा मात्रै समेटियो ।
काठमाडौंका लागि कप्तान फरवेज महारुफले ४२ तथा नरेश बुढाऐरले ४० रन बनाए पनि जितका लागि पर्याप्त भएन। बलिङमा विराटनगरका अंशुमन रथले ३ तथा बसन्त रेग्मीले २ विकेट लिए । त्यसअघि त्रिवि क्रिकेट मैदानमा टस हारेर पहिले ब्याटिङमा उत्रेको विराटनगरले निर्धारित २० ओभरमा ५ विकेट गुमाएर १५० रन बनायो ।
त्यस्तै, कप्तान पारस खड्काले २६, अनिल साहले ७ रन जोडे भने बलिङ तर्फ काठमाडौंका सोमपाल कामी २ तथा अमरसिंह रौटेलाले २ विकेट लिए । यता, काठमाडौंले भने लिग चरणमा खेलेका ५ मध्ये १ खेल मात्र जितेको छ। २ अंकमात्रै जोडेको काठमाडौंको सम्भावना लगभग सकिएको छ ।
