दलहरुको विवादका कारण राष्ट्रपति अप्ठ्यारोमा : राष्ट्रपतिका प्रेस संयोजक
काठमाण्डौ : राष्ट्रपति विद्यादेवी भण्डारीका प्रेस सल्लाहाकार माधव शर्माले राष्ट्रियसभा गठनसम्बन्धी अध्यादेश अध्ययनकै क्रममा रहेको बताएका छन् ।
दलहरु मिलेर नै सहज वाटो खोज्न सकिने भएकाले राष्ट्रपतिले दलहरुलाई आग्रह गरेको शर्माले बताए । दलहरुको बेमेलकै कारण अध्यादेश अगाडि बढाउन राष्ट्रपतिलाई गाह्रो भएको उनको भनाई छ ।
शर्माले अध्यादेशका बारेमा भइरहेको विवाद हटाउन दलहरुले आपसि सहमति गर्नुपर्ने भन्दै राष्ट्रपति विद्यादेवी भण्डारीले आफैँ पनि अध्ययन गरिरहेको बताए ।
राष्ट्रपति पदको गरिमा कायम राख्नुपर्नेमा दल र तिनका नेताहरुले जोड दिने गरेको भए पनि अहिले अध्यादेशको विवाद झिकेर राष्ट्रपतिलाई अप्ठ्यारोमा पारिएको शर्माको भनाई थियो ।
विवादस्पद रुपमा राष्ट्रपतिलाई तान्ने काम भएको उनको आरोप थियो । संविधानअनुसार राष्ट्रपतिले सरकारले पेश गरेको अध्यादेश स्विकृत गर्नुपर्ने भए पनि दलहरुकै विवादका कारण समस्या भएको उनले बताए ।
अन्य संचारमाध्यम र संचारकर्मीले पनि यस विवादलाई समाधन गर्न भूमिका खेलिदिन उनले आग्रह गरेका छन् । “सबै कुरा शितल निवासतर्फ तेस्र्याउनुभन्दा खोज पत्रकारिता गरेर जनतामाझ स्पष्ट पारिदिए हुन्थ्यो नि ।” शर्माले भने ।
