नयाँ किनेको घरमा प्रेमिका नातासासँगै देखिए वरुण धवन
बलिउड अभिनेता वरुण धवनले हालै मुम्बईमा नयाँ घर किनेका छन् । जसको ओपनिङमा कयौँ सेलेब्रिटी र उनका साथीहरु पुगेका थिए । यस दौरान उनकी कथित प्रेमिका नताशा दलाल पनि देखिएकी थिइन् । यसअघि दुई जनाको ब्रेकअपको समाचार पनि बाहिर आएको थियो । तर, दुई जना फेरि सँगै देखिएपछि उक्त हल्लामाथि पूर्णविराम लागेको छ । वरुण र नताशा बच्चैदेखिको साथीहरु हुन् । उनीहरु एकै स्कूलमा पढेका थिए ।
दुई जना कयौँ कार्यक्रम र पार्टीमा सँगै देखिएका छन् । तर, दुवैले आफ्नो सम्बन्धलाई खुलेर स्वीकार गरेका भने छैनन् ।यस बीच दुवै एउटै फ्लाटमा सरेको खबर पनि बाहिर आएको थियो । तर, पिता डेविड धवनले उनीहरुलाई लिभ इन रिलेसनमा बस्नबाट रोकेको बताइएको छ । अब वरुणले नयाँ घर लिएपछि दुवै फेरि सँगै बस्ने तयारी गरेको भारतीय मिडियाहरुले जनाएका छन् ।
वरुण हाल ‘अक्टुबर’ र ‘सुइधागा’ नामक चलचित्रको सुटिङमा व्यस्त छन् । सन् २०१२ मा स्टुडेन्ट अफ द इयरबाट बलिउडमा डेब्यु गरेका वरुणले त्यस यता मे तेरा हिरो, हम्प्टी शर्माकी दुल्हनिया, बदलापुर, एबिसीडी २, दिलवाले, ढिशुम, बद्रीनाथ की दुल्हनिया, जुडवा २ लगायत चलचित्रमा देखिएका छन् । उनले शाहरुख खानको माइ नेम इज खानमा एसिस्टेन्ट डाइरेक्टरका रुपमा पनि काम गरिसकेका छन् । @एजेन्सी
