दोक्लम विवादपछि पहिलो पटक चिनियाँ विदेशमन्त्री भारतमा
दोक्लम विवाद अन्त्य भएपछिको पहिलो उच्चस्तरीय भ्रमणमा चिनियाँ विदेशमन्त्री वाङ यी भारत पुगेका छन्। उनले भारतीय समकक्षी सुष्मा स्वराजसँग भेटवार्ता गरेका छन् । नयाँदिल्ली प्रस्थान गर्नुअघि विदेशमन्त्री वाङले बेइजिङमा चीन–भारत रणनीतिक साझेदारीले ‘आंशिक संघर्ष’ लाई उछिन्ने बताएका थिए। उनले गतसाता ’चीनको सीमा अतिक्रमण गर्ने भारतीय कदमलाई कूटनीतिक तरिकाले नै हल गरेको’ बताएका थिए ।
वाङ रुस–भारत–चीन त्रिपक्षीय बैठकमा सहभागी हुन भारत पुगेका हुन् । तीन देशबीच क्षेत्रीय र विश्वव्यापी मुद्दाहरुमा छलफल हुने बताइएको छ। रुसी विदेशमन्त्री सेर्गेइ लाभ्रोव पनि नयाँ दिल्ली पुगिसकेका छन् । ‘चीन र भारतबीच भिन्नताहरुभन्दा धेरै गुणा ठूलो साझा रणनीतिक स्वार्थ र आंशिक संघर्षभन्दा धेरै गुणा बढी सहकार्यको आवश्यकता विद्यमान छ,’ उनले भनेका थिए ।
दोक्लममा करिब अढाइ महिनाको तनावपछि यो चिनियाँ पक्षले गरेको पहिलो उच्चस्तरीय भारत भ्रमण हो। भारतीय पक्षबाट भने प्रधानमन्त्री नरेन्द्र मोदीले ब्रिक्स शिखर सम्मेलनको बेला चीनको भ्रमण गरिसकेका छन् । विदेशमन्त्री वाङको भ्रमणपछि स्टेट काउन्सिलर याङ जेइचीले भारत भ्रमण गर्ने अपेक्षा गरिएको छ। याङले भारतमा सीमा विवादबारे वार्ता गर्ने बताइएको छ ।
