प्रदेश नम्बर २ मा बाम निकै कमजोर : राजपा र फोरमको वर्चश्व
काठमाडौँ । प्रतिनिधि सभा निर्वाचन अन्तर्गत ३२ वटा क्षेत्र रहेको प्रदेश नम्बर दुईमा मधेसवादी दलहरुले वर्चश्व कायम राखेका छन् । हालसम्म गठबन्धनले ३ वटा सिटमा मात्र जित हासिल गर्न सकेको छ । देशभर सशक्त प्रदर्शन गरेको बाम गठबन्धन प्रदेश नम्बर दुईमा भने कमजोर देखिएको छ ।
यता, राष्ट्रिय जनता पार्टी नेपालले ७ तथा संघीय समाजवादी फोरमले ६ वटा सिटमा जीत हासिल गरेको छ । दुई पार्टी क्रमशः ३ तीन स्थानमा अगाडि रहेका छन् । नेपाली काँग्रेसले हालसम्म ४ सिट जित्न सकेको छ ।
सप्तरीमा निल
सप्तरी जिल्लामा बाम गठबन्धनले एक पनि सिट जित्न सकेन । यस जिल्लामा फोरमले २ तथा राजपा र नेपाली काँग्रेसले एक एक सिट जितेको छ ।
बारामा पनि गठबन्धन निल
बाराका चार निर्वाचन क्षेत्रमा बाम गठबन्धनले एक पनि सिट जित्न सकेन । यहाँ दुईमा फोरम र एक–एक सिटमा काँग्रेस र राजपा विजयी बनेको छ ।
पर्सा पनि रिङआउट
पर्सामा पनि बाम गठबन्धन निल बन्ने सम्भावना छ । चार क्षेत्रमध्ये एकमा फोरम विजयी भएको छ भने दुईमा अग्रता बनाइरहेको छ । एक क्षेत्रमा काङ्ग्रेस अघि रहेको छ ।
सिरहा
सिरहामा मिश्रित नतिजा देखिएको छ । ४ निर्वाचन क्षेत्र रहेको यस जिल्लामा एकमा एमाले र एकमा राजपा विजयी भएको छ । बाँकी दुई स्थानमध्ये एकमा नेपाली काङ्ग्रेस र एकमा माओवादीको अग्रता रहेको छ ।
धनुषा
यहाँ भने बाम गठबन्धनको स्थिति राम्रो छ । धनुषामा चार मध्ये एकमा राजापा र एकमा फोरम विजयी भएको छ । बाँकी दुई स्थानमध्ये एकमा माओवादी केन्द्रले अग्रता बनाएको छ । समाचार तयार गर्देगर्दा एमालेका रघुवीर महासेठले जीत हासिल गरेको खबर छ ।
महोत्तरी
महोत्तरीमा चार निर्वाचन क्षेत्र रहेको छ । यसमध्ये एकमा माओवादी र एकमा राजपा विजयी भएको छ । बाँकी क्षेत्रमा राजपा र फोरमको अग्रता रहेको छ ।
सर्लाही
सर्लाहीमा हालसम्म एक सिटमा राजपा विजयी भएको छ । बाँकी २ सिटमा राजपा र एकमा माओवादी अगाडि छ ।
रौतहट
रौतहटमा मिश्रित नतिजा आएको छ । चार सिटमध्ये दुईमा काँग्रेस, एकमा माओवादी र एकमा राजपा विजयी भएको छ ।
