वाम गठबन्धनका कारण लोकतन्त्र होइन कांग्रेसी शासन मासिन्छ : ओली
झापा : नेकपा एमालेका अध्यक्ष केपी शर्मा ओलीले कांग्रेसले आफूले जिते मात्रै लोकतन्त्र जोगिन्छ भन्नु हस्यास्पद भएको बताएका छन् । वाम गठबन्धनका कारण लोकतन्त्र नभई कांग्रेस संकटमा परेको उनले दावी गरे ।
चुनावी अभियानका क्रममा बुधबार बिहान झापाको चण्डीगढ विकानस्थलमा पत्रकारहरुसँग कुरा गर्दै पूर्वप्रधानमन्त्रीसमेत रहेका ओलीले कांग्रेससँग लोकतन्त्रको सीमित परिभाषा मात्रै रहेका आरोप लगाए। उनले भने, ‘कांग्रेसको लोकतन्त्र भनेको आफूले जित्ने मात्रै हो, अरुले जिते भने त उसले अधिनायकवाद देखिहाल्छ।’
प्रधानमन्त्री एवं कांग्रेसका सभापति शेरबहादुर देउवा देशैभर वाम गठबन्धनले जिते अधिनायकवाद आउँछ भन्दै हिँडेको भन्दै अध्यक्ष उनले त्यसको जवाफ समेत दिएका छन्। ‘वाम गठबन्धनका कारण लोकतन्त्र त सुरक्षित छ तर कांग्रेसले आफूलाई असुरक्षित महसुस गरिरहेको छ’, अध्यक्ष ओलीले भने, ‘अब लोकतन्त्र जोगिन्छ, कांग्रेसी शासन मासिन्छ।’
अध्यक्ष ओलीले कांग्रेस सकिदैमा लोकतन्त्र मासिने र कांग्रेस जोगिँदैमा लोकतन्त्र जोगिने नभएको भन्दै उनले वम गठबन्ध पूर्ण लोकतान्त्रिक रहेको दावी गरे ।
ओलीले निर्वाचन आयोगले आफूले निर्वाचन आचार संहिता उल्लंघन गरेको भन्दै पत्र काटेको बारे आफूलाई केही थाहा नभएको बताए ।
