गौचनको हत्यामा प्रयोग गरिएको आशंकामा दुई मोटरसाइकल जफत
नेपाल निर्माण व्यवसायी महासंघका अध्यक्ष शरद गौचनको हत्या भएको १९ दिन बितिसक्दा घटनाका दोषीहरुलाई प्रहरीले पक्राउ गर्न सकेको छैन । हत्यामा प्रयोग गरिएको आशंकामा प्रहरीले दुई वटा मोटरसाइकल भने जफत गरेको छ ।
हत्यापछि अभियुक्तहरु दुई वटा मोटरसाइकलमा भागेका थिए । तिनै मोटरसाइकल प्रहरीले जफत गरेको हो । जसमध्ये एउटा चोरीको मोटरसाइकल भएको अनुसन्धान समितिका एक सदस्यले बताए ।
निर्माण व्यवसायी गौचनको गत असोज २३ गते गोली हानी हत्या भएको थियो । शान्तिनगरस्थित घरबाट निस्किएलगत्तै गाडीमै उनलाई गोली हानिएको थियो ।
हत्यामा संलग्न व्यक्तिहरुले प्रहरीबाट जोगिन इन्टरनेट कल गरेकाले पनि अभियुक्तहरु पहिचान गर्न ढिला भएको प्रहरी अधिकारी बताउँछन् ।
घटनाको छानबिनका लागि डिआइजी गणेश केसीको संयोजकत्वमा छानबिन समिति गठन गरिएको छ । समितिले काठमाडौंका फरार गुन्डा समिरमानसिंह बस्नेत लगायतलाई शंकाको घेरामा राखेर अनुसन्धान गरिरहेको छ।
बस्नेतका सहयोगी लोप्साङ तामाङले घटना लगत्तै हत्याको जिम्मेवारी लिएका थिए । तीन साता हुन लाग्दा पनि प्रहरीले गिरोहका कसैलाई पक्राउ गर्न सकेको छैन ।
