दार्जिलिङमा ग्रिनेड आक्रमण गरेको आरोपमा गुरुङविरुद्ध मुद्दा दर्ता
पश्चिम बंगाल प्रहरीले गोर्खा जनमुक्ति मोर्चा अध्यक्ष विमल गुरुङसहित अन्य चार जनाविरुद्ध ग्रिनेड आक्रमण गरेको आरोपमा मुद्दा दर्ता गरेको छ । शनिबार राती कालेबुङस्थित एक प्रहरी चौकीमा ग्रिनेड आक्रमण हुँदा एक जनाको ज्यान गएको थियो ।
राती पौने ११ बजेतिर ग्रिनेड विस्फोट भएको थियो। घटनामा अर्का एक जना घाइते भएका छन् । यसअघि शुक्रबार मध्यराती दार्जिलिङको चोकबजारस्थित एक सुपरमार्केटमा बम विस्फोट भएको थियो। उक्त विस्फोटमा पनि गोजमुमो अध्यक्ष विमल गुरुङलाई आरोपित गर्दै प्रहरीले उनीविरुद्ध मुद्दा दर्ता गरेको थियो ।
गोजमुमो अध्यक्ष गुरुङले भने घटनामा विस्फोटनमा आफ्नो संलग्नता अस्वीकार गर्दै उच्चस्तरी छानबीन समिति बन्नुपर्ने माग गरेका छन् । उनले राष्ट्रिय अनुसन्धान संस्थाको संलग्नता तथा सर्वोच्च अदालतको निगरानीमा एक छानबीन समिति निर्माण गर्न गृहमन्त्री राजनाथ सिंहसँग आग्रह गरेका छन् ।
उनले अनुसन्धान नै सुरु नभइ एफआइआर दर्ता भएको भन्दै आन्दोलनलाई बद्नाम गराउने नियतले सरकारले नै विस्फोट गराएको हुनसक्ने बताएका छन् । अलग राज्य गोर्खाल्याण्डको माग राख्दै दार्जिलिङ लामो समयदेखि बन्द छ। गोर्खाल्याण्ड माग राख्ने कतिपय नेताहरुलाई पश्चिम बंगाल सरकारले अनेकौँ मुद्दा लगाएको छ भन्दै एबिपि न्यूजले जनाएको छ ।
