बिहारमा बाढीका कारण ९१ जनाको मृत्यु, ९६ लाख मानिस प्रभावित
भारतको पूर्वी राज्य बिहारमा बाढीका कारण कम्तीमा ९१ जनाको मृत्यु भएको छ । पछिल्लो तीन दिनदेखि परेको अविरल वर्षापछिको बाढी र पहिरोका कारण उनीहरूको मृत्यु भएको हो ।
पटना र आसपासका अन्य क्षेत्रमा अहिले पनि वर्षा भइरहेको छ । बाढीले सर्वसाधारणको जनजीवन कष्टकर हुनुका साथै करोडौँ मूल्यबराबरको क्षति भएको छ ।
बाढीबाट करिब ९६ लाख मानिस प्रभावित भएका छन् । बिहारका १२ जिल्लामा बाढीले अत्यधिक प्रभाव पारेको छ । बाढीले बिहारको राजधानी नगर पटनामा ठूलो क्षति पुर्याएको छ ।
बाढी–पहिरोपछि हजारौँ मानिस विस्थापित भएका छन् । विस्थापितलाई सरकारले विभिन्न शिविरमा राखेको छ । बाढीमा हराएका मानिसहरूको खोजीलाई तीव्र पारिएको छ ।
बिहारका मुख्यमन्त्री नितिशकुमारले उद्धार र राहत वितरणका लागि दुईवटा हेलिकोप्टर तयारी अवस्थामा राखिएको जानकारी दिए । बिहारमा मंगलबारसम्म वर्षा नरोकिएकाले उद्धार कार्य प्रभावित भएको छ । एजेन्सी
