प्रधानमन्त्रीको कर्णाली घोषणाबारे मन्त्रीकै चरम असन्तुष्टी
सुर्खेत २७ भदौ । संस्कृति, पर्यटन तथा नागरिक उड्ययन मन्त्री जीवनबहादुर शाहीले कर्णालीमा जन्म र मृत्यु संस्कार हुँदा दिने भनिएको २० केजी चामलप्रति असन्तुष्टी व्यक्त गरेका छन् ।
प्रधानमन्त्री पुष्पकमल दाहालले गत बिहीबार व्यवस्थापिका संसदमा राष्ट्रका नाममा सम्बोधन गर्दै जन्म र मृत्युमा २० किलो चामल दिने घोषणा गरेका थिए । उनले प्रधानमन्त्री दाहाल मन्त्रिपरिषद्कै सदस्य भएपनि यसबारेमा आफूलाई नसोधिएको भन्दै असन्तुष्टी व्यक्त गरे ।
उनले जन्म र मृत्यु संस्कारमा २० केजी निःशुल्क चामल दिनुभन्दा राज्यले कर्णालीमा प्रयाप्त चामल पुर्याउनुपर्ने बताए । ‘कर्णालीका जनताले अहिले पैसा तिरेर पनि चामल किन्न नपाएको अवस्था छ’ सोमबार सुर्खेत विमानस्थलमा पत्रकारहरुसँग कुरा गर्दै मन्त्री शाहीले भने, ‘यस्तो अवस्थामा जन्म र मृत्यु संस्कारमा निःशुल्क चामल दिन्छु भन्नुको कुनै अर्थ छैन् ।’
‘पैसा तिरेर चामल नपाइराखेको अवस्थामा जन्मदा र मर्दा निःशुल्क चामल दिन्छु भन्नु सुहाउने कुरो होइन्’ उनले भने, ‘बरु कर्णालीमा कसरी चामल पुर्याउन सकिन्छ भन्नेमा ध्यान दिन जरुरी छ।’ उनले प्रधानमन्त्रीको सम्बोधनपछि भइरहेको विरोधलाई पनि अर्थहिन बताए ।
संस्कृति पर्यटन तथा नागरिक उड्डयनमन्त्री शाहीले सात वटै प्रदेशमा एक–एक वटा हवाइजहाज राख्ने तयारी भइरहेको बताएका छन् । उनले सम्वन्धीत प्रदेशका जनतालाई सर्वसुलभ हवाई सेवा प्रदान गर्ने उद्देश्यले ‘एक प्रदेश, एक जहाज’ को अवधारणा ल्याइएको बताए ।
‘अहिलेसम्म हामीले अन्तराष्ट्रिय उडानमा मात्रै ध्यान दियौं, आन्तरिक सेवामा हाम्रो ध्यान पुग्न सकेको छैन्’ पर्यटन मन्त्री शाहीले भने, ‘मेरो कार्यकालभित्र सबै प्रदेशमा एक–एक हवाइजहाज राख्नका लागि प्रक्रियाको थालनी गरिसकेको छु।’
